世盃期間唔講波仲有乜話題好講？問題係，鍾意睇波又鍾意同人講波經都要有咁嘅條件先夠暢快。話實香港場來來去去都只撐「名牌」強隊，你話撐隊冷門，啲人隨時同你「開波」呀！另一最無癮係想睇場波，又要提早訂座又要最低消費，場波幾好睇條氣都唔順啦！反而澳門夜場就有唔少以波論波嘅酒吧，一大班波迷聚埋一齊，懶理你企坐踎抑或跪，圍埋攞住支酒就講波經，你話係咪爽死先？
好似位於大馬路嘅Kidult Club大細路飛鏢吧，咪以為佢哋淨係識組隊搞比賽掟飛鏢咁單一，查實場內聚滿一班超級波迷，睇佢哋官方facebook，但凡有足球賽事，總係第一時間出Po提醒波迷準時到場睇好波，而巴打就表示佢同坊間酒吧場睇波最大分別係可以一邊掟鏢一邊睇波，即使企晒起身掟鏢砌酒，阻住大銀幕，其他玩家都無投訴，齊齊嗌齊齊鬧，打成一片咁先有現場氣氛喎！唔鍾意逼？又可以三五知己上閣樓VIP區歎吓紅酒兼睇波，兩層均設有大型投射螢幕直播主要賽事，十足現場睇波咁好Feel呀！
地 點：澳門馬濟時總督大馬路100號珠江大廈地下Y舖
營業時間：6:00pm~3:00am
查 詢：（853）2872 3385
撰文：祖