講開花粉夫人，有一個傳說話佢原本就係青樓女子，喺小時候無意得到一套駐顏秘訣，所以人到中年都永保青春，人見人愛，而佢亦冇將秘訣私藏，只要有姊妹向佢求教，佢都肯毫不保留咁教授佢哋，個個囡囡都得佢過兩招，所以佢哋嘅花坊就艷名遠播，客似雲來，而且花粉夫人樣子秀麗，所以恩客無數，錢財寶物更係多不勝數，但花粉夫人一直視錢財如糞土，對姊妹們如同家人一樣，但凡姊妹有事，佢都慷慨解囊，親力親為，所以很多姊妹都受過佢嘅恩惠，但可惜天妒紅顏，花粉夫人好年輕就去世，青樓嘅姊妹為咗紀念佢嘅大恩大德，所以喺青樓內設牌位供奉佢，後嚟一傳十，十傳百，間間妓院都爭住拜她，最後更有人將佢放入寺廟中供奉，因此漸漸成為青樓女子例必供奉嘅神祇之一，至於兩個傳說究竟係同一個人，定係完全無關，咁就唔清楚啦！但當年澳門同香港嘅妓女們，全都拜她來求丁求財求美貌，相信呢吓一定唔會假，但已經係過百年嘅歷史，家陣新一代囡囡，又有幾多個知道呢？