記得小時候去食親牛腩麵，啲牛腩都係柱候牛腩，佢味道濃郁，啲香味幾條街外都聞到，但由於柱候醬嘅主要材料除咗用黃豆外，仲會用到豬油，唔合乎近年健康飲食嘅標準，所以好多舖頭都改用清湯牛腩，由於好耐冇食過，所以特別令人懷念。咁啱前日上咗去金池桑拿，突然聞到陣陣柱候嘅香味，於是捉住侍應一問，佢哋員工飯今日正係食柱候蘿蔔牛腩，於是搵經理求佢整碟我試吓，經理免得我麻煩，於是就整咗碟畀我歎。啲牛腩香到不得了，而且好腍，炆到入晒味，咬落去入口融化，肉汁同濃湯喺口腔裏面渾然天成，好食到停唔到口，至於啲牛筋亦都腍晒，好似食軟糖咁樣，但呢味菜重點並唔係牛腩，而係配菜嘅蘿蔔，佢完全吸收晒柱候汁同牛腩嘅香味，一咬入口，配上蘿蔔嘅清甜，濃淡交纏，令人感動到眼濕濕，因為太有童年時嘅味道，再點啲辣椒醬簡直就係極品，於是勸經理經常推出，佢話冇問題喎！