「打波至嚟落雨？唔通連個天都唔鍾意我？」呢句對白大家都耳熟能詳，特別係近日連場大雨，更覺記憶猶新。其實踢波遇到落雨真係冇咩好怕，打水戰可謂別有一番樂趣。然而，當工作遇上落雨就陰功，為咗搵食冇得推，新進人氣女優真野惠里菜就正正係成日都要雨天工作，故有「雨女」嘅稱號。
不同髮型可以予人不同感覺，女仔留住一把長長秀髮感覺斯文大方，留一頭及肩短髮就清爽清新，仲散發住一股陽光氣息，兩者比較大家鍾意邊一種呢？小弟我就鍾意後者，好似真野惠里菜咁就至啱我口味喇。今年23歲嘅惠里菜係近期日本藝能界相當具人氣嘅女優，呢位妹妹仔甜美可人，青春活潑，可以話係一位陽光美少女，加埋一把清爽短髮，令大家感受到一股溫暖得猶如雨後陽光嘅美好感覺。至於身材方面，佢呢副纖巧靚偈同樣予人健康之感，除咗因為其胴體夠弗夠苗條，並冇多餘脂肪，仲因為阿妹嘅三圍應大則大，例如其33C上圍；應細則細，例如23吋小蠻腰以及修長美腿，以上種種條件都令惠里菜更加迷人又誘人。
惠里菜好後生嘅時候就夢想成為明星，原因係當時佢相當仰慕早安少女組成員松浦亞彌。為咗達到夢想，惠里菜就毅然參加美少女藝人選拔活動「Hello！Project Egg選拔 2004」，只可惜落選。後來，阿妹佢參加完早安少女組出席嘅宣揚防止地球暖化活動，燃起加入藝能界發展嘅一團火，再次面試上述活動，終於獲得成功，被挑選加入美少女團體Hello！Project。惠里菜加入藝能界之後發展唔錯，除咗跟團體四圍演出，仲有好多機會主唱歌曲，第一首歌就叫做《少女的祈禱》，亦因為阿妹佢5歲就學彈鋼琴，乃係團體中極少數識彈琴嘅成員，所以唔少歌曲都係由阿妹負責彈琴伴奏。不過，有阿妹出席嘅活動都好似連個天都唔鍾意，事關大多數都會突然落雨，故此阿妹就有「雨女」嘅稱號。近期，惠里菜備受力捧，動漫作品經典《機動警察》嘅真人版劇集就係由佢飾演女主角泉野明，睇嚟未來阿妹前途一片光明。
真野惠里菜經常喺博客上透露每日動向，想緊貼阿妹嘅一舉一動，了解佢鍾意去過邊、食過乜，就不妨Click上去睇。
網址：http://ameblo.jp/manoerina-official/
年齡：23歲
身高：5呎3吋
三圍：33C-23-33
撰文：賢