澳吧吧：劈韓國燒酒

身邊唔少老友每次去親澳門玩，都鍾意揀有鏢掟嘅酒吧。雖然澳門唔少酒吧都設有飛鏢機，但佢哋卻鍾意去呢間位於馬大臣街嘅Ton80 Cafe。咪睇佢個名有個Cafe，就以為佢只係賣咖啡，其實佢不但有飛鏢機可玩，到咗夜晚仲會提供各式酒類，當中除咗大路嘅啤酒品牌外，亦有各式嘅雞尾酒供應，最重要就係佢有得劈韓國燒酒！須知道劈啤酒、威士忌等我哋就劈得多，韓國燒酒相信冇乜邊個會劈過，亦極少喺酒吧度劈。如果唔想劈得咁激嘅話，大可以試吓低酒精度嘅飲品，質素同樣有保證。