今日同大家介紹一個地方，就係位於水塘附近海邊馬路，近澳門半島東望洋山一帶，以前呢度叫做「劏狗環」，單睇個名大家實以為一定同中國人愛食狗肉有關，答案啱咗一半。據講三百多年前，荷蘭人率千人艦隊，巨炮六十門，打算從葡國人手上強奪澳門，好等佢哋有據點開拓東亞市場，而當時葡國士兵只得百五人，火炮十隻手指都數得晒，可以話強弱懸殊，所以只能駐重兵喺南灣一帶，荷蘭軍隊曾嘗試強攻，但遭葡軍力挫，於是將艦隊開去澳門東南面，就搵咗一個沙灘登岸，呢個淺灘叫做「劏狗環」，而故事就嚟啦！傳說劏狗環是供應澳門狗肉嘅集中地，所以劏狗場林立，而因為有軍隊入侵，村民全都走光，荷蘭士兵登陸一望，見到狗屍遍地，士兵們都被嚇親，以為葡人兇殘或者係落咗乜嘢詛咒，士兵們全都不敢推進。但當時嘅司令賴臣見機不可失，於是要佢哋繼續前進，點知出村一陣，突然槍聲四起，有四十個士兵中槍身亡，而司令賴臣亦腹部中槍，於是被迫暫時撤退！