日本AV界人才濟濟，女優多不勝數。之不過，物以罕為貴，一種物品提供愈多就愈唔值錢，AV女優亦係一樣，最近就有調查顯示AV女優嘅片酬大不如前，比起2009年更加下跌3至9成，真係陰功！
每當朋友問：「點解日本咁多靚女去拍AV出賣肉體呢？」我通常都會答：「為搵食囉！」事實上一直以來，日本女仔視拍AV為搵快錢嘅途徑，不過，最近有指AV界已經唔再係一個容易搵食嘅地方。據一位任職日本關東地區AV廠嘅員工表示，由於近年日本經濟不景氣，以致AV碟銷量下降，為咗減低成本，AV廠都會開源節流，例如縮減女優嘅片酬。而據統計資料顯示，喺關東地區拍AV嘅女優片酬由2009年起計，到近年普遍下降5成，關西地區嘅女優仲慘，以往連拍多部四仔可獲得60萬日圓片酬，但係家陣四仔廠多數搵女優作一次性演出，令四仔女優只得5萬日圓落袋。
雖然AV女優嘅片酬大幅下降，但關西AV界人士就話好多女仔下海嘅時候都唔介意片酬低。另外，一位來自關東地區嘅AV界人士表示，雖然片酬少咗，但係以一個質素中上嘅女優嚟講，初出道拍一部AV有2萬日圓片酬，若表現出色，獲得更多個人演出機會，日後可提升至100萬日圓片酬，對於唔少女仔嚟講仍具吸引力。佢仲補充話，幾乎每個月都有超過20個女仔到AV公司應徵做女優，原因除咗係搵錢，佢哋仲希望可以一脫成名。呢班女仔之所以有咁嘅諗法，全因現時好多AV女優，如吉澤明步、蒼井空等都成功打進外地市場，令班後生女對AV界產生憧憬。此外，據講現時日本風俗界亦唔係咁好景，風俗孃一日賺到3萬日圓並唔容易，亦因此令更多女仔投身AV界搵食。
撰文：賢