賣弄肉體嘅女人通常都被人話唔正經，不過世事無絕對，好身材又肯露嘅女仔亦可以形象健康，日本好多水着妹就予人呢種正派感覺，好似鈴木千奈美咁，更加充滿教育感以及正義感喇。
小弟剛過生日，又老一歲。班朋友同我慶祝嘅時候，例牌問我有乜生日願望？我今年嘅願望就係搵個又夠高又好身材又靚女又斯文又健康嘅女朋友，班朋友即時大表驚訝，問我：嘩！往年願望都係是但有個女友就算，點解今年玩到咁大呀？我答：橫掂我都冇人鍾意，要求高低都係一樣啫！佢哋又話：但係……有冇咁多正嘅女仔呀？我即答：梗係有啦！鈴木千奈美咪係囉！今年24歲嘅千奈美可能係我，又或者係大家見過最正嘅日本水着妹。點解？先睇個樣，佢生得氣質綺麗又不失青春嬌美，笑容仲好甜美。講身材，千奈美呢副真係曠世靚偈！講高挑？千奈美有成5呎7吋，夠高未？講纖巧？千奈美條腰得23吋咁幼！講事業線？千奈美上圍有E-Cup咁勁！綜合以上種種，千奈美係咪正到甩轆先？
2008年千奈美初次以模特兒身份拍寫真，其實佢當時都唔係幾鍾意，因為感覺藝能界好複雜，經父母開導之後，心情才開朗咗，決心喺藝能界闖一番事業。可能就係多咗呢份決心，幫助到千奈美喺2009年，參加東麗水着Campaign Galle比賽嘅時候成功奪冠。不過，成名之後千奈美工作漸多，演出上嘅諸多煩瑣事務令佢經常抱怨，仲唔多願意同工作人員合作添。幸好，後來某次拍攝雜誌封面嘅時候，工作人員嘅認真態度，加上照片出嚟效果令千奈美大感驚喜，即場令阿妹佢感動落淚，決定勤奮努力嚟報答大家。千奈美嘅努力受到不少老闆嘅賞識，得到好多參演電影嘅機會，作品包括《海猿》、《東京無印女子物語》以及《FASHION STORY》等。除咗拍戲同拍寫真，千奈美仲擔任nhk電視台《高校講座•生物》嘅主持人。最近，千奈美健康嘅形象仲獲得日本警方嘅邀請，擔任今年1月10日警視廳通信指令中心嘅部長一天，負責接聽報案及求助電話。
鈴木千奈美好識得享受人生，一得閒就四圍去玩，如果大家想知道千奈美最近玩過乜，食過乜，可以上佢博客留意。
網址：http://ameblo.jp/suzuki-chi/
年齡：24歲
身高：5呎7吋
三圍：31E-23-34
撰文：賢