家陣嘅女仔成日都將減肥掛於嘴邊，但佢哋希望身上肥肉減少之餘，又想上圍增大，世事又邊有咁理想呢？不過諗諗吓又好似得喎！來自日本嘅美人兒河內麻沙美就成功減磅，但係個胸又好似大咗喎，各位女仔不妨以佢做榜樣喇！
日本藝能圈唔少女星都係出身於美少女組合，松浦亞彌、後藤真希就係前早安少女組成員，前田敦子、板野友美就出身自AKB48。佢哋脫離組合作個人發展之後都有一個共通點，就係不時露一露姣好身段，肉誘更加多觀眾留意自己，以提升知名度以及唱片或寫真集嘅銷量，近期作個人發展嘅河內麻沙美就唔係學幾位師姐，而係幾位師姐學佢，未作個人發展之前就已經成日盡騷一副好身材。今年26歲嘅麻沙美嬌俏可人，笑起上嚟甜美又迷人，散發出陽光一樣咁溫暖嘅感覺，秋冬日子見到佢真係成個人都暖晒。除咗美貌同笑容吸引，麻沙美嘅身材亦同樣誘人。雖然阿妹佢生得唔係好高，只得5呎2吋，不過就擁有35D-23-34嘅三圍，曲線玲瓏，而且身上嘅肉地結實彈手，好明顯就係平日經常做運動所致。
麻沙美係2009年成立嘅SDN48第一代成員，SDN嘅全名為SaturDay Night，團體同AKB48、SKE48一樣都係由知名製作人秋元康一手處理。而SDN48主要以賣弄性感胴體為主，為免牴觸青少年保護育成條例，佢哋又跳又唱嘅舞台表演一律禁止18歲以下人士入場觀看。由於麻沙美係其中一位成員，故此其嬌美胴體就可以盡情展露於人前喇。據資料顯示，麻沙美本身其實有少少肥，變到家陣咁苗條誘人原來有段古。上年，麻沙美就同SDN48成員光上星愛被邀請參加一項由日本減肥產品品牌舉行嘅挑戰活動，要佢哋喺六個星期之內減輕3公斤體重。結果二人都成功達標，並且順利成為該品牌嘅產品代表人。之不過，好多人都覺得奇怪，就係麻沙美減肥成功，但係上圍卻冇縮水，仲因為腰圍細咗，睇落胸部嘅體積仲大咗添！
SDN48雖然已經解散，但係河內麻沙美依然好繁忙，從佢嘅博客可以睇到阿妹忙於宣傳一手創立嘅時裝品牌，另外亦不時參與舞台方面演出。
網址：http://ameblo.jp/masamikouchi/
年齡：26歲
身高：5呎2吋
三圍：35D-23-34
撰文：賢