一間食店人氣急升，未必因為店內嘅食物好味，亦未必係經知名食家推介，原因可能係入面有個貌美女店員，好似台灣嘅知名嫩模雞排妹鄭佳甄，就令其炸雞排店人氣旺盛，更令佢進身人氣嫩模之列。而日本嘅松本若菜亦同樣來自人氣鰻魚飯店。
小弟一向都認為家陣嘅纖體廣告有啲誇張，因為佢哋成日鼓吹瘦就係靚，搞到下至18歲少女，上至50歲婦人都要瘦身瘦身瘦身，葫蘆身形就話迷死男人啫，瘦到成條藤咁款真係村長個女李愛喇，你估人人都可以好似松本若菜咁纖瘦得嚟又咁索咩！29歲嘅若菜妹雖然接近三字頭，但係女人味至剛剛好蘊藏而出，其清麗秀雅嘅氣質甚有古典美人感覺，當今實在難求。清秀嘅若菜身材又真係幾瘦，身高5呎3吋嘅佢三圍得31-22.5-34，雙腿修長之外，手臂亦相當瘦削，幸而，若菜佢上圍同玉臀都有肉地，唔覺瘦骨嶙峋之餘，火辣程度仲幾高添！
若菜讀高中嘅時候已經係一名美少女，15歲就喺家鄉鳥取市一間生活百貨店做模特兒，由於其氣質驚人，受藝能事務所嘅負責人以及名演員奈美悅子注目，邀請佢加入藝能界，阿妹就好有自信咁表示：藝能界我就入硬，但係要讀完書先。在學時期，若菜就好似迷上烹飪一樣，先取得廚師執照，更先後到燒鱆魚丸店、日式煎薄餅店同咖啡店工作。畢業之後，阿妹亦做過美容院嘅接待員。呢個時候，阿妹至醒起自己有事務所負責人嘅電話，於是就打電話過去安排簽約，從而成功進身娛樂圈。為咗應付喺東京生活嘅沉重負擔，若菜佢一邊做模特兒，一邊打工，工作地方又係同食有關，因為該處係一間鰻魚飯專門店。若菜索得咁緊要，令佢被街坊稱為「鰻魚店的美貌女店員」，仲吸引到好多狂蜂浪蝶添。家陣阿妹已經冇賣鰻魚飯，因為工作多籮籮，拍劇一套接一套。
松本若菜會將自己平日飲飲食食，出入高級食店嘅情況拍下照片放上博客，想知阿妹近期又去食咩正菜，可以Click上去睇。
網址：http://ameblo.jp/creep9552/
年齡：29歲
身高：5呎3吋
三圍：31-22.5-34
撰文：賢