讀書、裸胸、女權三者之間有乜嘢關係？原來佢係由美國紐約一個女權組織所發起嘅運動。佢哋所舉辦嘅「性感裸讀」，目的係希望維護女性裸體嘅權益，讓袒胸成為解放女性嘅象徵。至於點解要係裸讀呢？據稱可以證明女性袒胸目的並非想吸引人哋嘅注意，加上讀書亦係知性嘅表現，從而更能凸顯女性嘅獨立性，故此呢個組織不論係好天定落雨，落雨定落雪，都會搵埋班姊妹齊齊嚟個性感裸讀。唔講唔知，原來早喺1992年時，紐約通過法律，女性可以喺公共場合赤裸上半身，故此當大家去到紐約見到有女士袒胸讀書，千祈咪覺得奇怪呀！
撰文：魂
又係女權組織Femen嘅新聞，佢哋今次抗議嘅對象，並唔係國家政要，而係芭比娃娃。話說5月16日德國柏林，有袒胸露乳嘅示威者，出現喺當地芭比夢幻屋嘅前面大聲疾呼，最後將芭比娃娃釘喺十字架上用火焚燒，好多朋友都唔知佢哋搞乜？事後該組織發表聲明，抗議芭比夢幻屋開幕，話當代女性不應學芭比只愛靚屋靚衫，有將女性形象狹隘化嘅企圖。新聞播出後，不少口痕網友指出，如果連芭比娃娃都禁賣，富家小女生自然冇問題，但一啲窮苦小女生，就連夢想嘅機會都冇埋，咁唔知又係咪歧視貧苦大眾呢？
撰文：小德
話說5月16日英國倫敦街頭，出現一男一女嘅遊客，佢哋頭戴禮帽，一絲不掛，喺倫敦嘅標誌性建築物出現，警方接報後，第一時間趕往現場，最後把兩人帶署調查。原來兩人係嚟自澳洲，係一個全球性推動裸體活動嘅成員，佢哋曾經喺澳洲全裸騎電單車橫渡悉尼大橋，更喺德國嘅火車上，全裸咁載歌載舞，兩次都被人拘捕，但佢哋毫不氣餒，話繼續會喺全球推動裸體活動，更稱自己為「裸體十字軍」。有網友覺得佢哋咁做法都幾有意義，但可惜啲成員年紀較大，如果有啲十八廿二嘅年輕美女參加，影響力就會更大喎！
撰文：小德
日前墨西哥搞咗個大型選美會，據講有120人報名參加，最後選出25人進入決賽，反應咁熱烈，照計比賽現場唔係大劇院都係展覽中心，但一睇個地址，原來係當地嘅拉梅薩監獄。話說有個幫助囚犯更生嘅志願組織，為咗令女囚犯提高自信心，將來融入社會，所以搞咗一個大型選美活動，起初以為冇乜人參加，點知最後竟有咁多人報名，大會仲要搞個初賽嚟甄選，比賽當日單係幫手化妝吹頭嘅義工都要過百人。當日參賽者個個都顯得信心十足，最後冠軍雖然只得一人，但其他參賽者都深受感染，對未來人生充滿希望。
撰文：小德