去龍會玩到三更半晚，附近啲食店大部分都收晒檔，個肚呢個時候猛咁打鼓，都唔知點算好？最慘仲畀囡囡聽見，笑笑口問我係咪肚餓？我話食消夜要返入市區，一來一回浪費晒啲時間，不如即刻上房歡度時光好過！囡囡認真善解人意，佢介紹咗呢度嘅著名小食，就係「咖喱牛筋腩炒麵」，佢話好食到不得了，食咗包保我精神爽利，龍精虎猛，於是整碟嚟試吓，等咗十零分鐘，熱辣辣、香噴噴嘅炒麵送到眼前，服務員一揭蓋，啲咖喱香味撲鼻而至，真係成個人爽晒，口水直流，於是攞起筷子就咬，啲牛筋腩好腍，睇嚟炆咗好耐，入口味道甘香，個麵底睇嚟用澳門著名嘅蝦子麵，以猛火快炒，所以唔係炸成麵餅咁樣，最後加入腍晒嘅牛腩同咖喱汁，令每條麵身都充滿咖喱香味，三分鐘唔使，連個清湯都飲埋，正到無嘢講，呢碟麵要九十大元，但真係物有所值！