香港被稱為「遊行之都」，但遊行文化幾十年都冇乜改變，每次上街，遊行人士例必一臉怒火。反觀外國嘅遊行示威就有睇頭得多，現場氣氛好似嘉年華一樣，就以3月9日台灣反核大遊行為例，絕對值得大家參考一吓。
話說台灣政府想起第4座核電廠，但民間見過日本核電廠咁大鑊，極之反對再起核電廠，於是就發起大遊行。據講當日台灣各地都有遊行，而單喺台北就有近5萬人出席。由於衣着方面冇特別限制，所以唔少人都着到成隻雀咁出席，口號五花八門之餘，標語亦相當有心思。而為咗製造新聞，唔少女士亦好配合，以一身辣妹裝束出嚟遊行，搞到現場波濤洶湧，只要有辣妹經過，就會引起圍觀者吶喊，而佢哋亦會揮手微笑，報答群眾嘅支持，置身現場別有一番風味。
另外，亦有啲人氣偶像，一早就喺社交網站大肆宣傳自己會幾點出發，仲貼埋自己會着嘅服飾，粉絲們當然係沿途布防，只要一見偶像經過，就狂呼大叫，囡囡再飛個吻或者單個眼，引起圍觀者起哄。遊行人士同圍觀者經常互動，唔似本地遊行，你睥住我、我睥住你！仲有啲懷孕嘅準媽媽，都出嚟遊行，幫未出世嘅小朋友發言，佢地喺肚皮上寫上要求無核環境嘅訴求，係咪好有意思呢？不過數最吸睛，當然係有啲囡囡利用胸部嚟反核，真係有創意又有睇頭，我哋港人下次遊行都要諗諗新意思好。
撰文：小德