澳門曾經受葡萄牙統治，所以留下好多葡國文化特色，唔少建築物同食物都充滿葡味。其實，我哋去澳門飲飲食食，以至落酒吧豪情暢飲，仲可以感受到葡國文化以外嘅滋味，例如係非洲風味。位於漁人碼頭嘅非洲村酒吧就為客人帶來非一般嘅非洲風情喇。呢間酒吧嘅裝修充滿非洲原始部落感覺，木籬笆、茅草屋頂、圖騰柱，以及仿黃土製造嘅牆壁，令人猶如置身於非洲一樣，情緒都High啲。不過，酒吧感覺原始之餘，一樣會提供現代嘅酒類飲品，仲有飛鏢同桌球供玩樂，將現代與原始嚟個Crossover。另外，現場仲有Live Band演奏助興，氣氛十分熱鬧。