去澳門想問前程，除咗到媽閣廟拜媽祖求籤之外，好多朋友都會去摸骨算命，據講十分靈驗，吸引唔少客人幫襯。講到摸骨嘅歷史，可以追溯至前清時代，當年澳門係南方嘅大商埠，華洋雜處，居住咗唔少有錢人，佢哋三妻四妾享盡齊人之福，但妻妾間難免勾心鬥角，唔夠人爭嘅太太，就會求神問卜，但當時男女有別，大富人家嘅太太們又點可以隨便畀人睇相呢！於是就有盲人摸骨算命嘅出現，你話畀人摸仲蝕底啦？大家有所不知，當時盲人按摩十分流行，所以婦女們都接受被盲人觸摸身體。而摸骨師傅一摸就知來者前世今生，不知幾多有錢太太，爭住去摸骨推斷吉凶，後嚟更吸引唔少名妓跟風去摸骨。據講呢啲摸骨師傅唔使囡囡自報家門，一摸就知對方係做妓女，直言囡囡天生「鳳骨」，當然美其名為「鳳」，實際就係妓女啦！係咪咁神奇，信不信由你！