好多人都話香港係一個不夜天，但我就覺得澳門比香港更有資格取得呢個稱號，因為澳門不少賭場同夜場都係廿四小時營業，就算唔入去玩兩手，行過街道都會欣賞到賭場外嘅璀璨燈光。另一方面，唔少食店亦營業到三更半夜。唔想食嘢，睇場戲又如何呢？香港嘅戲院通常都只係提供午夜場，但係澳門就有戲院開埋深夜場，凌晨點幾兩點都有戲睇。大家唔好以為咁夜冇人睇戲喎，早前澳門一間提供深夜場嘅戲院幾乎晚晚爆場，而上映嘅就係本地經典名作《3D肉蒲團之極樂寶鑑》。雖然呢部作品喺香港落畫多時，但喺澳門就持續上映到上年12月，場數超過四百，據聞仲成為澳門有史以來上映時間最長嘅電影添！而緊接落嚟嘅《一路向西》亦一樣令戲院深夜場火紅，澳門人又真係幾鍾意睇鹹片喎。