年紀小嘅時候，小弟成日去舅父屋企玩。記得一次，見到舅父鬼鬼祟祟喺度睇錄影帶，就梗係好好奇咁問佢睇乜戲啦。舅父就一臉正經咁話，呢套戲叫做《感官世界》。一聽之下，我以為係同《變變變生命力》之類嘅科學探知作品，當然不作理會啦。到今時今日至知道，呢部原來係曠世名作，更加稱為「世界十大禁片之一」。不過講呢套1976年嘅名作之前，先講一講其導演大島渚先。
大島渚剛於本年1月15日去世，享年80歲。佢嘅作品以前衞大膽見稱，同黑澤明、小津安二郎齊名，地位崇高，而佢最為人熟悉，最受爭議嘅作品就一定係電影《感官世界》喇。電影以日本1936年發生嘅「阿部定事件」改編，故事講述一個曾經做妓女嘅女仔阿部定，佢從良之後去到東京一間旅館做女僕。由於秀色可餐，吸引到老闆石田吉藏對佢生起色心，先向佢百般淫辱，再玩SM，甚至進行各種性愛實驗。後來，吉藏對阿部定由虐生愛，而阿部定對吉藏亦生起佔有慾。吉藏更加為咗阿部定而拋棄老婆，從此陷入糾纏不清嘅戀愛關係當中。之後，吉藏因為享受窒息性愛而死，阿部定就將其生殖器切落嚟，繼而用血喺吉藏嘅心口寫住「定吉二人永遠廝守」。
雖然作品冇家陣嘅三仔四仔咁直截了當畀晒觀眾欣賞男女互動嘅交接位，但係眾多交歡場面傳聞話係打真軍冇借位，其他性虐環節亦拍得逼真到肉。另一方面，故事又描述男女縱情淫樂，浸淫於愛與痛嘅病態樂趣，意識大膽，挑戰當時尺度，令作品更受爭議，好多國家都禁止作品上映。
撰文：賢