以下呢篇文絕對唔啱啲豪氣玩家睇，點解？因為今次係講啲夜總會有乜嘢蠱惑賣酒招數，對豪客嚟講當然一啲都唔肉痛，但對啲精打細算嘅玩家嚟講，就唔係咁講喇！明明四支公去玩，無情情畀人屈咗十幾打啤酒，仲要落得肚嘅每人圍埋都唔夠一打，你話幾咁唔抵呀！
講到銷酒技巧玩得最叻嘅，梗係東莞嘅夜總會啦！有資深嘅經理表示，酒水錢係夜總會重要收入，因此呢啲伎倆係佢哋入行首要嘅訓練項目之一，加上佢哋每人其實都要孭一條數，跑唔夠數就冇得撈。為咗可以有效地賣酒，簡單嚟講佢哋會將玩家分為細枱同大枱兩類。細枱即係玩家人數少，大枱即係人數多。對於人少嘅枱，經理主要以打龍通嘅方法賣酒。大家都知四支公加四條女，加起嚟得八個人，每人最多咪飲一打啤酒，計起嚟都唔夠十打！為咗推銷，班經理就會輪住入嚟之餘，偶爾又拉幾個私底下相熟嘅囡囡幫手，等班玩家唔覺得佢哋咁Hard Sell。
對於大枱嚟講，呢位經理話方法仲簡單，因為人多個場面就亂，尤其係等班玩家飲得面紅耳熱時，佢哋係咁塞啲人入嚟，當中唔單止有經理，仲有啲冷板櫈女，反正佢哋又冇生意，經理又識做，每人私底下醒番啲車馬費，最重要係間成千呎嘅房，氣氛高漲到爆，啲啤酒就好似爆水喉咁點倒都有，再加埋一啲旁門左道伎倆，好似明明玩家嗌咗十打，經理就從中抽起咗兩打，反正班玩家已經飲到啤啤夫，邊個仲會逐支逐支去數呢？此外，佢哋又會以買二簽一嘅方法嚟呃班玩家，等已經貓咗一半嘅玩家，以為嗌多啲都只係半價，結果係咪嚟咗咁多啤酒都冇人知，唔通啲玩家第二日落去同經理對數咩？
地點：東莞
語錄：唱歌攬女兼劈酒，酒水數量暗中扣，班友醉到搏命嘔，點知條數夠唔夠？
撰文：豆鼓