去博物館會覺得悶，情願北上好過？咁又未必，如果話你知去嘅係性愛博物館，係咪即刻有興趣呢？其實全球好多地方都有性愛博物館，當中除咗收藏情色藝術作品外，更有古時嘅情趣用品，而早排有美國旅遊網站，選出全球三間最值得一去嘅性愛博物館，等大家去旅遊、血拼之餘，亦可嚟個知性之旅！
荷蘭出名係個性觀念開放嘅城市，當中尤以紅燈區至為聞名，原來坐落於首都阿姆斯特丹嘅Venustempel Sexmuseum亦相當出名！事關喺1985年開幕嘅佢，係全球首間對外開放嘅性愛博物館，不但每年吸引超過五十萬名遊客，分為三層嘅展館，每層都有唔同嘅主題，當中包括各種性愛藝術品、畫作、性愛紀錄、情趣玩具等，種類繁多之餘，佢仲不定期舉辦唔同主題嘅展覽，帶畀大家全面嘅性愛知識。
2002年開幕嘅Museum of Sex，擁有十五個主題展廳，五個立體投影室，同埋超過萬五件情色藝術品，不論館藏量定係佔地，都相當具規模。有別於其他嘅性愛博物館，館內設有專業嘅導賞員，邊為遊客介紹各種展品，邊為大家講解背後嘅歷史同意義，為大家帶嚟別樣嘅性教育之旅。此外，佢仲有專門展廳，介紹人類性愛嘅歷史，好似性愛觀念嘅演變、情趣用品嘅變化，以及情色藝術發展等等，相當具有知識性！
又係美國嘅性愛博物館？係咪因為係美國網站嘅選舉，因此益自己友呀？咁就梗係唔係啦！呢間性愛博物館確係有佢嘅特色！事關World Erotic Art Museum嘅宗旨係「It's art， not porn。」意思即係佢係介紹情色藝術，而唔係玩鹹濕噱頭，因此大家入去時千祈唔好戴有色眼鏡，反而應用藝術角度去欣賞。博物館內除咗有油畫外，仲有各類雕塑、陶瓷、裝置藝術等，邊個話性愛冇藝術性o架？
講到曳曳嘅藝術，點可以冇浪漫之都巴黎嘅份呢？呢間位於巴黎嘅Muse de l'rotisme，開宗明義介紹曳曳嘅藝術。除咗有各種同性愛有關嘅作品、古代情趣玩具外，最吸引就係恐怖性愛藝術展，當中有古時懲罰不忠婦女同偷食男嘅刑具，真係好恐怖o架！
撰文：魂