申良哥：（+_+）最近東莞喺小長假搞咗個萬人相親大會，吸引咗各地嘅剩男剩女嚟參加，希望碰碰運氣，修成正果，但係唔知點解，男女雙方相睇了解嘅過程，男嘅似嚟應聘面試，女嘅似嚟招聘挑選咁樣，唔好話一啲都唔浪漫，而且大家做乜嘢工作、賺幾多錢、家庭背景等，全部攤晒出嚟，咁樣相親，有乜嘢意思呀？
辛涼子：（#o#）要怪就只能怪自己，做得剩男，本身條件一定有啲問題，唔係樣子唔討好，就係說話唔得生動，否則早就識到女仔啦！使乜嚟相親，而咁啱剩女嘅問題唔係眼角高就係做人太過直，所以至遲遲都嫁唔出，你話當一群剩男遇上剩女，情況唔係變成見工面試，仲會有乜嘢好事發生，所以不如實際啲以家底財富選老公好過。
藍奔相：（^v^） 我話啲女仔太過現實就真，明明自己嘅條件出問題，就永遠唔理會自己嘅缺點，反而放大男生嘅缺點，之後就要男生作出補償，唔係要有樓有車就要豪花幾十萬至肯嫁，如果係我一定會數臭女方嘅不是，要佢哋好好反省點解幾廿歲人都嫁唔出，唔係諗得太多，就係唔夠溫柔，睇佢哋仲敢唔敢自抬身價，扮晒魚蝦蟹。
呂泮梁：（@o@）我話你哋啲男仔小器至真，永遠都想以小博大，希望花最少嘅錢，娶一個最好嘅老婆，喺婚事上男人永遠着數晒，你估仲係咸豐年代咩！家陣女性本身嘅價值就已經大大提升，你哋花少少錢嚟表示一下，都牙痛咁聲，將來有啲乜嘢大事，點敢搵你哋嚟負責呀？大家既然傾唔掂數，不如繼續單身好過。