九十年代嘅鋼管舞表演，一直都係集中喺脫衣舞會內，所以大部分人都一直對佢戴咗有色眼鏡，認為是色情表演一部分。不過近年鋼管舞已經慢慢跟色情脫鈎，更被形容為新興嘅健康運動之一。世界各地更紛紛舉辦鋼管舞大賽，其中一個「Miss Pole Dance」大賽，更被好多鋼管舞蹈家視為必爭之地。
2000年代中期開始，鋼管舞開始發展成健身運動比賽，改變咗好多人對鋼管舞嘅印象，甚至有人推動鋼管舞作為代表在2012年倫敦奧運會嘅測試賽，可見鋼管舞已經愈來愈入世。再加上鋼管舞需要大量的力量，柔韌性和耐力，自然吸引好多想減肥嘅女性注意呢項運動。近年美國加州嘅鋼管舞蹈學校如雨後春筍般不斷增加，嚟學習嘅女性包括家庭主婦、辦公室女郎、女強人等等，紛紛對呢種新興減肥運動趨之若鶩。
「Miss Pole Dance」每年都會喺唔同國家舉辦，參賽者亦來自世界各地，夠膽參加呢個比賽嘅都係高手中嘅高手，事關呢個比賽嘅評分，以高難度作為畀分嘅標準，而動作包括好多攀登、旋轉、身體倒置，及用四肢抓握等等，每位參賽者都經過嚴格訓練，先至有今日嘅成績。而參賽者的動作愈優雅、愈高難度，愈令人目瞪口呆，就會得到愈高分。所以現場所見，每位參賽者都得到觀眾好多掌聲，更不停發出讚嘆聲。
不過除咗高難度之外，評判亦會睇舞者整套動作嘅連貫性及優美度，最終冠軍落在一位阿根廷舞蹈家Maria Luz Escalante手上，佢一身柔軟的筋骨，再加上強大的力量，令她可以空中做出很多令人咋舌的動作，好像只靠單腿鈎住鋼管，從而支撐整個身體停留在半空、單手空中一字馬等等，都是令評判大表讚賞的動作，並認為佢嘅舞蹈係運動與藝術嘅結合。
撰文：七瀨