馳力王有個老友，最近上網中咗天仙局，佢話一定要馳力王講出嚟，等其他骨友有所防範。事緣佢早排上網識咗個內地朋友，呢個朋友有日打畀佢，同佢講自己生日，搞咗個派對，邀請佢上去玩。老友因為平時都好貪玩，當然一口應承。上到去某KTV，點知呢個內地朋友已經叫咗鬼咁多女上來坐，又飲又食成個大豪客咁樣，老友都覺得有點奇怪，不過一時間冇為意，但係玩咗一粒鐘之後，老友已經High High哋，唔察覺條友已經閃咗人，突然間間場嘅經理就攞張單入嚟，老友睇一睇，淨係間房同酒水，已經2,600人仔，囡囡6個，每人300，共1,800人仔，全部共4,400人仔。佢身上冇卡又冇咁多現錢，惟有急Call朋友帶錢來救自己，結果搞咗成晚，又畀人眼超超。佢諗深一層，初初去到間場，經理好似識呢條神棍，到埋單時候又話唔識，好明顯係成班人夾定晒口供，擺明屈水，所以真係要帶眼識人，返內地玩，千祈唔好亂咁跟新朋友去添呀！馳力王其實以前都有聽聞內地有屈水場，不過錢財身外物，最緊要人平安無事，因為喺內地出事，絕對唔係講玩。