聖誕節係個普天同慶嘅日子，每年到咗今日，都係蒲友出動嘅時候，尤其係蜜運中男女，更係重要嘅一日！不過對乾物男同宅男呢班Lonely男嚟講，既冇女友又冇女性朋友，又點樣慶祝呢？美國就有夜總會，推出「Sexymas Girlfriends」嘅服務，專門打救呢班Lonely Heart。
聖誕節參加派對，對好多人嚟講係必然嘅節目，但對一班冇女，又唔擅於應酬嘅單身男嚟講，真係唔知點樣可以分享到節日嘅氣氛。美國加州就有夜總會推出呢項服務，等單身男都可以投入呢個喜慶日子。據有關方面表示，提供呢個服務嘅目的，係為咗讓一班獨男唔使咁孤獨之餘，仲可以等佢哋享受溫柔鄉嘅滋味。
玩家只需要預早一日打電話預約，並根據對方畀嘅電腦登入密碼，揀選心水性感Girlfriend，跟住再繳交有關費用，翌日喺預訂時間，就能享受呢種咁特別嘅服務。除咗可以讓自己開心外，有關方面更指唔少男士，更視呢種服務作為聖誕禮物咁送畀單身老友，預先為對方安排女友上門服務，等佢有個意外嘅驚喜！
呢班哎吔女友上門後，究竟會提供乜嘢服務？唔好以為呢班夜總會索女，只係提供情慾服務咁簡單，原來佢哋仲會充當節日大使，不但會同玩家談心、玩遊戲，仲會同對方玩交換禮物。有曾經享受過呢種服務嘅玩家表示，佢就試過收到女郎送上嘅原味底褲，實在讓佢感到意外！
除咗有一對一嘅服務外，玩家想玩得更熱鬧嘅話，可以預約多於一個嘅哎吔女友上門，自然玩得更加興奮。此外，呢間夜總會仲會提供派對女郎上門服務。須知道每年到咗今日，唔少男士都會喺屋企搞派對，若然成班都係仔嘅話，你話幾咁冇癮呢？玩家大可約一大班索女上門齊齊玩，氣氛固然熱烈得多，仲可以同班索女有下文添。之不過每位囡囡時薪唔平，每粒鐘要成四百美金，折合約為三千一百港紙。雖然係貴啲，但一年一度嘅聖誕節，冇理由一支公或只係一班麻甩佬一齊過，係咪？
撰文：峰魂簫