經過呢兩、三個月嘅嚴打狂風後，唔少夜場都畀人搞到得番半條人命，有啲夜場見到咁嘅情況，就決定移師到武漢，諗住可以東山再起。小弟早排撞到個相熟嘅夜總會經理，佢話下個月公司會搬，搬去武漢度做。我就覺得奇怪，話晒佢個場都有一定人氣，點解無情情會搬呢？
佢嘆氣道：「你有所不知喇！呢幾年老深一帶成日打風，本來打一、兩個禮拜都冇乜所謂，咪當係畀啲囡囡放吓假。點知近年日打夜打，有時一打就成幾個月。須知道囡囡冇得喺度搵食，就可以去其他地方啫！不過我哋打開門做生意，喺個場度投資咗咁多錢，就算閂門唔開，我哋都要畀舖租o架嘛！咁樣搞法，真係執咗都唔掂！於是我哋諗住趁家陣仲有啲資金，就決定搬去武漢。話晒嗰邊嘅舖租平啲，管得又冇咁嚴之餘，加上高鐵效應同埋佢本身都係夜蒲熱點，最重要就係啲女，唔使吓吓南下老深咁遠，就腳啲，囡囡都會多啲，故此相信可以帶嚟唔錯收益嘅！」
條數睇落就係咁計，但最重要係搬咗去咁內陸嘅地方，唔知道損失咗班港客，可唔可以喺班內地玩家身上得到彌補啫！
撰文：大軍