近年香港人不時討論嘅話題，除咗樓價高企同通脹加劇之外，剩女問題亦係熱門之一。內地同樣有呢個問題，而且仲唔單止係冇拖拍嘅女仔，仲有好多男士亦搵唔到對象，所以坊間成日都有大型相睇活動出現，當中有好多成為囡囡搵快錢嘅場合添。
撰文：賢
隨住內地男女地位愈來愈平等，女仔嘅人工同學歷都愈來愈高，唔少都想搵個條件更好嘅男朋友，大家都知道啦！要求高自然將目標範圍愈收愈窄，要搵到理想對象咪更難囉。至於內地男仔方面，好多都因為成日讀書同顧住打機，搞到自己嘅交際能力大大下降，因此令佢哋溝女出現困難。正因為咁，內地剩男剩女嘅問題日趨嚴重，早前坊間仲自定咗11月11日為光棍節，希望藉節日效應，令剩男剩女可以踴躍上街搵對象，好等自己脫離光棍行列。另一方面，坊間亦有好多婚介中心出現，大做呢班剩男剩女生意。除此之外，網上亦不時出現大型相睇活動，而當中有唔少都係由酒吧老闆搞出嚟嘅主意，因為只要將相睇地點定喺自己間酒吧，就可以將生意額提升喇。
呢類酒吧舉行嘅大型相睇活動有好多類型，有正正常常男女雙方面對面交談嘅，亦有特別嘅黑燈相睇，據講熄咗燈之後交談可以避免大家以貌取人，講說話都會特別交心喎。而及後出現嘅蒙眼約會都係運用呢個道理。不過，蒙眼約會就多一個方便，就係可以摸一摸對方隻手仔，如果得到對方許可，摸一摸大腿亦是可行，當然動作一定唔可以咁狼死，好似電車癡漢咁食髓知味愈摸愈上啦。到最近有人發現呢類蒙眼約會，已經成為流鶯搵食嘅地方，原因亦係酒吧老闆作怪。因為老闆覺得單係搞約會都係唔夠利錢，所以特別安排流鶯入場，等佢哋可以引誘客人上釣，自己亦可以趁機會收取提成。
一般心急想搵對象嘅男仔會從不同渠道搵機會，而唔少透過上網搵相睇活動嘅男仔，好多時就誤墮呢種蒙眼約會嘅陷阱。雖然唔敢講呢類蒙眼約會入面嘅女仔全部都係流鶯，不過十之七八都離不開。每當有大型掃黃活動，令場內一眾小姐都要搵其他地方謀生嘅時候，流鶯比率可能仲會提高添。而約會開始嘅時候，流鶯經常唔會咁猖狂，只係同對方談吓心，摸吓手仔，但係語氣通常聽得出係夜總會小姐嘅一套虛情假意，只差一句「老闆」未講出口而已。眼見對方接受程度漸漸提高之後，流鶯動作更猖狂，捉住對方雙手摸自己個胸，然後再細細聲向對方表示可以陪埋上房，不過就要收少少車馬費。對方此際已經慾火高燒，幾錢就幾錢，一於上房去也。