本地膠袋徵費取消上繳到政府庫房，難怪民間表示「自廢武功」，不如索性取消徵費啦！喂！除此之外，原來脫星界都鍾意玩自廢「舞」功，莫非佢哋都有留意本地News？
阿爸教落，讀書唔成無所謂，最緊要有一技之長，否則將來餓死老婆瘟臭屋。雖然細佬由細到大都深明呢個道理，無奈能力有限，始終都冇一技傍身！問題一啲都唔奇，奇在脫星Ann Poll有都放棄，莫非係身家大把食飽無憂米？當然唔係啦，否則都唔會當脫星任你指指點點，原來關鍵係阿妹認為理想大於一切，情願捱餓都唔肯背棄理想喎！
Ann Poll自稱由細已開始學習舞蹈，現代舞、芭蕾舞、社交舞逢舞皆精，畢業後更投身舞蹈界，無奈市場有限，阿妹有料但冇機會發揮，頭兩年連「最低工資」都未達標！
通常衰到谷底就會反彈，但唔代表必然o架！Ann Poll由入行衰到尾，係佢腳頭唔好定行頭難撈毋須深究，皆因三年後阿妹已改行當脫星，入行初時已人氣爆燈，成為公司力捧新一姐，得到公司同影迷力撐，阿妹可謂「錢途」一片光明，可惜當事人並不安於現狀，搵到錢冇買車買樓，一炮過開舞蹈訓練學校，親自落場教埋一份，哈！原來成事在天，一年唔夠學校收生不足摺埋，今次真係要瞓身四仔至夠還債囉！
怪只怪Ann Poll當初冇計掂盤數就亂闖，不過佢並未言敗，收檔一年後嘅今日，聽聞阿妹將會再次辦學，但今次學精乖咗，事關佢會教授脫衣舞，歡迎男女參加，冇得教社交舞，改跳脫衣舞，都唔算自廢舞功吖？
撰文：祖