絕大部分玩家去夜總會梳乎，都會揀間夠大、夠氣派嘅夜總會，咁先至玩得夠豪！不過，原來大唔一定受歡迎o架，蚊型夜總會同樣叫好又叫座。講緊嘅就係呢間最早喺英國出現，被譽為全球最細夜總會嘅The Miniscule of Sound嘞！
呢間夜總會早喺1998年8月，於倫敦Hackney嘅一個廢棄泳池度出現。至2000年時，佢就搬咗去喺英國嘅Chats Palaces Centre附近，並以1.2米乘2.4米嘅尺寸，被健力士紀錄大全列為全球最細嘅夜總會。唔好睇佢得嗰兩米幾平方米嘅「嘥士」，就以為佢冇料到，原來佢可以容納到DJ在內，總共14個玩家，另外仲有一個兩平方米嘅舞池，畀人跳舞添！
雖然呢間夜總會只係臨時性質，表演之後就會拆卸，但由於佢實在夠的骰，故此經常被邀請到世界各地巡迴演出，在日本、北京、澳洲等地，吸引唔少一級DJ嚟呢間迷你夜總會度表演。據講呢間夜總會，將會喺今年5月12至15日，到西班牙演出，唔知大家有冇興趣去見識吓呢？
撰文：阿豪