唔好話留港建港，定係北上玩樂，幾時都話埋單時千祈唔好用信用卡，免得第日張銀行月結單，落喺條女手上，到時解畫都有排解。老友不嬲都深明呢個道理，故此每次佢北上尋歡，都例必袋定一定數量嘅現金，既防不時之需，又可以避免捉蟲。本嚟咁做都相安無事，點知有次佢去完夜總會玩埋單時，一個唔留神用咗張信用卡結數，而當佢發覺嘅時候，張卡已經過咗機，呢個時候已經恨錯難返！
從嗰日起，老友每日都定時定候查信箱，睇吓張月結單幾時到。等咗好多日，都未見張月結單寄嚟。佢條女見佢咁緊張，就問佢發生乜嘢事，老友梗係唔出聲啦！呢個時候佢女友就拎咗張月結單出嚟，老友一見面都青埋，心諗：「呢鋪大劑喇！」奇就奇在女友好似若無其事咁，乜事都冇。老友趁女友行開咗，就拎張月結單嚟睇，發覺夜總會用個名，居然係間酒樓！又會咁特別嘅？後嚟佢終於明白，原來呢間夜總會，用咗間酒樓嘅帳戶，等啲客用信用卡埋數時，都唔驚會賴嘢，咁細心，玩家梗係鍾意啦！
撰文：大軍