最近網上有篇探討掃黃嘅文章，被網友大事轉貼，喺轉貼之後仲表示大力支持，其實文章內容好簡單，就係探討掃黃嘅成效，近年內地各大城巿都高調進行咗大大小小嘅掃黃行動，而當中竟然得不到網民嘅認同及接受。
大家有留意新聞，近年內地唔少大城巿，都不定期進行掃黃行動，而有關單位為咗令行動更成功，仲會安排埋傳媒即場直播，令掃黃行動表面上好似做得十分成功，但原來網民就唔係咁諗！
網絡上有篇冇署名嘅文章，批評家陣掃黃似做秀多過執法，有時為求畫面逼真，好多時都係破門而入，係要記者拍到光豬男女為目的，觀眾睇到當然夠晒震撼，但之後民眾更關心嘅係，究竟行動中真正檢控咗多少人？查封咗多少間夜場呢？
除咗掃黃嘅檢控或者定罪數字唔清晰之外，文章仲講到一日不拘捕到幕後黑手，呢啲夜場仍然會死灰復燃。
網民所講嘅幕後黑手，其實就係一直包庇夜場嘅違法單位，文章正好切中要害、狠狠批評，自然深得網友嘅支持。據一啲熟悉夜場運作嘅網民回應，叫大家咪咁天真，要抓呢批幕後嘅夜場老闆，已經唔係一件容易嘅事，如果仲想順藤摸瓜，捉埋幕後包庇者，簡直係天方夜譚。原來就算係喺夜店工作嘅人員，都未必知道夜場嘅真正經營者係邊個，更何況係幕後，所以要喺掃黃時拉呢批人歸案，絕不容易。
要根治黃業，真係一件十分困難嘅事，反而有網友就話應該學台灣，倡議娼妓無罪化，可能效果會更好，因為少咗批有勢力人士同貪官剝削，得益嘅就係買賣雙方，囡囡可以搵多啲，客人又有更好服務咁話。
其實我哋都講過好多次，每次掃黃行動主要戰場，都係同傳媒去拍攝，所以呢間場十分重要，但太大又怕得罪人，太小又怕冇料到，所以大多數都係城中數大夜場嘅四五位，一來有名氣，二來保證有「客人」幫襯，而行動大多數都係喺黃金時間，以一間大場為例，黃金時間唔擠滿人就奇，但每次都只係拉到十零廿人，你話係咪有蠱惑吖？
撰文：小德