小芬：本人今年三十六歲，自從三年前同男朋友分手後，就再無拍拖，所以已經三年無性行為，唔知係咪因為無滋潤，所以近呢一年，塊面成日生暗瘡，以前有拍拖嘅時候，都唔係咁樣，搞到我一個月做幾次美容都無用，我又見到有啲朋友，剛剛開始拍拖，皮膚好似特別靚咁樣，我想問究竟係咪無性愛滋潤，特別容易生暗瘡？
答：其實呢方面嘅問題，係有啲科學根據嘅，生暗瘡係因為精神壓力同埋激素不平衡所引起嘅，而性生活真係可以減輕精神壓力，同埋促進激素平衡。所以你話自己三年無性行為，的確有機會引起呢啲問題，再加上你又擔心自己無男朋友，所以無形壓力唔多唔少都增加咗，有機會導致你暗瘡頻生。
然而唔係所有性愛都可以令暗瘡消失的，因為根據專家分析，不和諧嘅性生活，係不能改善情緒，反而會令情緒更加起伏，出現的問題更多，所以你唔好以為性生活一定可以醫治暗瘡，反而生活和諧，心情輕鬆，才可以令暗瘡不藥而愈，所以一定要注重自己身心平衡才是上上之策。
撰文：陽起子