記得十年前買鹹碟，認真神神秘秘，通常都係行行吓街，突然有個師奶走出嚟，問你要唔要買黃碟，之後佢一輪嘴咁數晒啲鹹片主題出嚟，你唔走嘅話，佢可以一直講落去，認真夠專業。但今時今日，只要去內地一啲小型商場，甚至超巿都有鹹碟賣！
熟悉行情嘅朋友都知道，鹹片喺香港主要分為三仔同埋四仔，三仔係經電檢處檢定，可以上映同喺巿面出售嘅影視作品，一般情況唔係重要情節被剪，就係打上格仔；而四仔就係未經送檢，裏面全部都係打真軍嘅作品，買賣都要偷偷摸摸。而喺內地則一律叫做「黃碟」，有時你問佢哋係三仔定四仔，佢哋都唔知點答你，往往會喺啲商場播畀你睇，內地碟迷就習以為常，途人亦會因你試碟而高興。但港人去買，突然淫聲浪語，你都咪話唔尷尬，記得以前買賣係好鬼祟嘅，但點解家陣咁夠膽成行成巿呢？問過一啲知情人士，原因有二，一係成本平咗好多，以前一隻光碟都要十幾廿蚊成本，所以要搵師奶以小量兜售，萬一被人充公都會減輕損失。
但家陣成本只需個零兩蚊隻，成檔鹹碟都係幾百蚊貨仔，比起賣雜貨嘅攤販，仲要小本錢，所以一啲都唔怕畀人拉。
二來佢哋會借屍還魂，將香港嘅三級劇情片，混入三級愛情動作片嚟魚目混珠，於是你行經超巿或者書店，發現有唔少三級片可以買到，當中除咗有三級劇情片之外，更多嘅就係日本嘅薄格愛情動作片，佔總數嘅九成多，你都咪話唔誇張。有部分人當晒佢哋係三級劇情片嚟看待，當然搶住嚟入貨啦！
另外，除咗去小型商場有三級片賣，原來去一啲橫街窄巷嘅小型超市或者街巿，只要有光碟售賣嘅攤檔，裏面就有三級，甚至四級光碟出售，當中乜嘢內容都有，你只要攞起一張碟睇吓，檔主就會同你滔滔不絕咁介紹，唔買番幾張，睇嚟都幾難甩到身！
記得以前買碟，要一百蚊三張，真係貴到不得了，但家陣喺超巿買嘅三級片，十蚊已經有一隻，但都未算最平，假如去啲攤檔買仲平，每碟只係五蚊，如果你國語好，扮街坊，隨時四蚊就有交易，真係賤物鬥窮人，邊個可以忍得住唔買吖。
撰文：小德