依家做脫星真係少啲腦汁都唔掂！不過有咩方法最經濟、唔犯法，同時可以達到出位之效呢？咁就要學美國某脫星過機場安檢喇！早前佢上機前接受身體檢查時，主動剝衫剩低底褲，阿妹實行無聲抗議，雖然報道冇公開當事人資料，但即引來網民人肉起底。難怪脫星Bobbi Eden都話要有樣學樣啦！
要出位方法有好多，公司揼本力捧肯定最快，但未必最有效，因為呢一代嘅四仔迷追求有共鳴。何謂有共鳴呢？簡單講即係要做啲嘢囉！美國基於飛機安全條例，事必要每一次乘客上機前接受全身檢查，呢種侵犯個人私隱行為一直為人詬病，但為咗上機亦迫於無奈忍受。之不過早前有脫星就率先自剝，實行以此抗議，外界收到料即時要將佢起底。恕細佬小人之心，我諗當事人並非為抗議，純粹係想博出位啫！
脫星們知道事件後，梗係唔會坐喺度乜都唔做啦，事實上不少脫星都出嚟抽水，公開指摘安檢有損乘客尊嚴，更考慮群起裸體到機場抗議！而脫星Bobbi Eden更考慮只帶乳貼及下身穿T-Back登機，係咪咁益街坊先？
脫星Bobbi Eden向來都語不驚人誓不休，今勻仲公開呼籲脫星着內衣上機作抗議，阿妹更話身先士卒做榜樣。佢解釋：「雖然我有考慮只穿胸圍底褲上機，但為免引起公眾混亂，出發前有需要周詳計劃一下，或者會加一件大褸蔽體，方便到檢查部門時即剝！」但外界就認為阿妹呢鑊嘢並非為民請命，事實係想趁機抽水，希望引起大家關注，結果都未正式剝衫，Bobbi Eden就被網民群起抵制，可謂打錯算盤囉！但阿妹認為冇所謂，更話：「若然係純粹宣傳，網民現階段群起反對，已達到宣傳之效啦！」又講得啱，脫星唔在乎對錯，最緊要出到位就夠啦，似乎阿妹比喺機場剝衫嘅脫星更醒，真係搞多幾次都唔怕啦！
撰文：祖