最近收到消息，被內地網民捧為全日本AV界人氣偶像嘅蒼井空，竟然同一名喜劇演員拍拖，拍拖都唔緊要，可惜呢位男友嘅樣子，真係幾另類吓，有人竟用「豬頭」嚟形容，唔少網友仲指係「美女與野獸」，點解會一朵鮮花，插喺牛糞上呢？
撰文：小德
話說呢位男演員蜂蜜三郎，喺日本係個半紅不黑嘅搞笑明星，同松田大輔合組「東京炸藥」嘅搞笑組合，人氣唔錯，但搵錢唔多，唔講唔知，三郎佢以前曾經做過AV男優，對AV圈子有一定認識，所以同蒼井空能夠傾到心事，可能同呢樣嘢有關！
蒼井空被傳出同異性拍拖，本來都冇乜咁大不了，但最令網民憤怒嘅，就係三郎嘅尊容，單睇網上發放嘅照片，好多網友都以為佢係「全日本通緝犯」，事後知道佢與偶像拍拖，不少人都話無法接受，聲稱「豬頭三」不應侵犯佢哋嘅女神。好彩消息擾攘咗幾日之後，有報道發現三郎其實早已經結婚，網友們先至鬆一口氣。
但原來三郎女人緣不薄，佢老婆竟係前「早安少女」嘅成員齊藤瞳，證明三郎樣子普通，而佢識女仔嘅手段，真有一手，唔係點會人氣偶像都死喺佢嘅手上，所以真係人不可貌相。而搞到內地網友咁大反應，主要係蒼井空係少數成功登陸內地嘅AV女優，阿妹佢除咗擁有童顏巨乳之外，仲好有內涵同智慧，好似最近有網絡女星批評佢係賣弄身體，等同妓女，佢得知後馬上喺微博回應：「我脫光衣服躺在鏡頭前，只為了生存，而你衣冠楚楚的站在鏡頭前，卻只為了私慾和欺騙……」贏得網民一致叫好，相信蒼井成功登陸內地後，生存嘅空間大咗，咁就千祈唔好浪費，積極搵銀，暫時放下兒女私情，免得粉絲們失望。