以往返內地玩要小心搶錢黨，但今日要小心搶手機黨！有玩家爆料，話喺東莞厚街酒店門外被搶手機，亦有玩家於常平及深圳街頭玩手機時被搶！而佢哋嘅共通點係身體冇受傷，手袋、銀包及證件亦冇被搶走，賊人只針對佢哋手上嗰部潮人必用嘅iPhone 4，可以相信賊人搶機後去變賣套現。
就此事我大軍問過不少內地人，包括骨場經理、夜場媽咪等，佢哋都表示，呢部上帝手機魅力實在太勁，內地賊偷或搶一部攞去變賣，仲好過冒險搶你手袋、銀包，以一部二手iPhone 4為例，攞去放售隨時可賣到三至四千多人仔，整個過程不用五分鐘搞掂，相反搶人客銀包頂多都係一千幾百人仔，既要摷又要丟，風險程度大大提升，現時iPhone 4梗有一部喺左近，難怪賊人都湧住搶手機！
撰文：大軍