提到冰島，大家相信會諗起足球名將古莊臣，又會諗起佢哋成個國家都因為金融海嘯搞到破產。不過，睇完今次嘅介紹之後，大家就會對冰島有一個新印象，就係乜鞭都有喇！冰島東北部Reykjavik有一間名為The Icelandic Phallogical Museum嘅博物館，雖然細細間，入面冇上千年嘅歷史文物，亦冇價值連城嘅名畫，不過，一樣可以令大家大開眼界！
因為，博物館內展出272件，來自92種不同動物嘅鞭！冇錯！正是虎鞭、海狗鞭、牛鞭嗰種鞭。除咗上述三種動物嘅鞭之外，極為罕見嘅大象、熊以及海豚等等嘅「寶貝」一應俱全。主要以乾製及浸製方法儲存，掛滿幾面牆以及放滿長枱，畀遊人細心欣賞。當中，除咗長度驚人嘅大象鞭夠睇頭之外，館內亦有好多特色展品，例如用動物陰囊乾製成嘅燈罩就係最過癮嘅其中一款喇！據消息指出，一名年約九十五歲，叫做Pall Arason嘅老伯伯已簽下同意書，死後會將寶貝捐出，到時博物館又多一件珍貴展品喇！
撰文：祖