喺內地開夜店，不論大型夜總會抑或蚊型足浴店，最怕就係遇上嚴打，好似家吓場風打咗足足幾個月依然未見停止，導致生意大降，收入大受影響，於是部分場所要求旗下囡囡暫時停工，一來避風頭，二來又可以減少支出。而呢班被迫放假冇工開嘅囡囡，惟有自行想辦法搵銀。
撰文：娟娟
據熟悉內地夜場行情嘅肥仔炳所講，近年嘅嚴打行動與早幾年分別甚大，除咗推行跨區掃蕩，而次數之頻密亦係大家都意想不到，內地夜店生意自然大受影響，以往百分百安全嘅鐵竇，亦難逃被掃場嘅命運。近年成為內地淫業主導嘅桑拿自然成為重災區，唔少店舖被迫關門大吉，就算繼續經營，但玩法上都唔能夠再好似以前咁出位。肥仔炳話：「早排到過東莞一間桑拿場，臨上房先知道VIP房暫時唔會提供使用，當時真係打咗個突，事關一般房間只係按摩之用，想享受囡囡嘅特別服務，就要喺VIP房內進行，如今封房，即係想玩得入肉啲都唔得，齋揼骨，梗係覺得冇癮啦！」肥仔炳又話，不只客人受影響，就連啲囡囡都向佢詐型，事關呢間場係業績與薪酬掛鈎嘅，家吓唔開VIP房嘅話，客人就會減少，佢哋嘅收入都會減少。
對於玩家嚟講，呢間場冇得玩，大可以轉場再玩，之不過喺場內工作嘅囡囡可以話別無選擇，人工大減，生活上自然大受影響，為咗捱過呢個時期，惟有自行想辦法解決。最近肥仔炳收到風，得知有啲囡囡以住宅來作掩飾，私下接客搵外快。佢話：「家吓有啲囡囡會喺桑拿附近租咗個小單位。不過，房間有限，而且唔能夠太張揚，所以只有熟客先可以享受呢項特別服務。據我所知，呢個情況好耐之前已經出現，可能係三、四個囡囡夾份租一個單位，分時段輪流接客。此外，我亦曾經聽過有啲囡囡與媽媽生合作，邊個人屋企方便就用嚟招呼客人。老實講，以呢個方式去搵銀，所賺得嘅收入唔會好多，但至少可以幫補吓家計。」
因為單位屬於私人地方，所以有機會避過有關部門嘅搜查，之不過肥仔炳卻唔鼓勵大家去呢類私宅淫竇玩。佢話：「首先係安全問題，呢啲淫竇多數以密封式設計，唔會設有走火通道，若然發生火警嘅話，咁就認真大件事。而最危險就係浴室嗰個舊式熱水爐，如果空氣唔流通，導致室內積存大量一氧化碳，隨時命仔不保。再講，有啲淫竇只係臨時性質，囡囡點會注重衞生？可以肯定床單唔會定期清洗及消毒，若然上一個客人患有性病，咁你中招嘅機會自然大增，唔想賴嘢嘅話，去呢啲地方玩之前，認真要諗清楚先呀！」
近期內地嘅嚴打行動從未間斷過，搞到夜場界風聲鶴唳，有時一個星期掃三次，亦試過一日內大舉出動，殺個措手不及。然而，有行內人士表示，後果嘅嚴重性，就要睇有關部門是否跨區行動，因為同一區嘅部門出動，娛樂場所或多或少會收到消息，如果係從其他區域調動人手，咁就好難聞風作出準備喇！