曾有報道指出，內地夜總會為咗逃避巡查，紛紛叫啲囡囡唔好着華麗晚裝，改穿便服侍客，本來真係幾妥當，囡囡混入客人當中，負責單位難以察覺，但就惹嚟內地豪客嘅不滿，強烈要求囡囡着番晚裝開工。
話說長沙一帶嘅夜總會，為咗應付嚴打，下令所有囡囡改着便服坐枱，但就引起客人嘅強烈不滿，特別係一啲大老闆，佢哋嘅意思就係使咁多錢嚟玩，無非係想威番吓，家陣安排啲「街女」嚟充當夜總會小姐，佢哋覺得物非所值囉！
而且一啲做生意嘅老闆，上夜場除咗自己尋開心之外，仲要應酬生意上嘅客人同貴賓，間場又大又靚，但啲囡囡同街邊嘅髮廊妹着嘅衫一樣，你都咪話唔失禮死人，所以好多客人都提出反對，強烈要求夜場恢復囡囡着華麗晚裝上枱。有見及此，唔少夜場嘅老總都好頭痛，如果要全部囡囡換番晒晚裝，咁咪變番以前一樣，查牌查晒啲囡囡身份，都要幾個鐘，認真費時失事，但唔使囡囡着晚裝，啲客人又詐晒型。
於是有老總諗到，囡囡着乜嘢衫上枱，全部交由媽咪負責，因為媽咪係第一個接觸客人嘅職員，佢哋應該夠專業，分清楚呢間房嘅客人係純屬猜枚飲酒，定係要嚟消費應酬。咁又係，如果媽咪連客人係咪老闆都睇唔出，咁呢啲媽咪好打極都有限。
但有個問題出現，就係囡囡要準備兩套衣服，一套要嚟招呼普通客人，一套就要嚟招呼貴賓，但未坐枱前，入房畀人揀嘅時候，咁佢哋應該着乜嘢衫呢？事關囡囡返工，唔係第一個客就可以上枱，如果當中又有大客，又有普通客，佢哋咪好似時裝表演咁，換衫換到氣咳。但啲老總話，順得哥情失嫂意，惟有犧牲吓啲囡囡，蝕底啲啦！
原因係囡囡着晒晚裝，擺明就係夜場嘅職員，喺查牌時所有職員都要登記，但如果囡囡着普通便服，就可以扮作客人，而客人係唔使登記嘅。有人話登記咪登記囉！又唔係拉人，但試想一間夜總會過百個小姐，要登記晒往往要花幾個小時，期間唔可以唱歌或播音樂，咁咪同停業一樣，家陣少咗囡囡登記，查牌啲人好快就走人，之後大家又可以癲過。
撰文：小德