內地掃黃打大風，夜場冇啖好食，為咗避重就輕，唔少夜場都要改變玩法，好似喺珠海就有間高級夜總會，每晚囡囡返工就超過兩百人，個個規定着上性感晚裝，好似小公主咁喺花街搔首弄姿，本來十分吸引，但囡囡一入房竟然又要換上便服示人，點解呢？
呢間由於係星級夜場，所以消費亦好乸脷，一間三人細房最低消費就要一千二百元人仔，咁嘅價錢，唔少港人都未必幫襯得起，至於囡囡嘅小費，雖然分成兩種，但一樣叫價好高，一種係二、八、十，另一種就係三、十、十三，第一個數目就係小姐坐枱嘅小費，第二個數目係小姐短聚嘅價錢，第三個數目就係包夜嘅收費。價錢真係好高，所以幫襯嘅都係當地有頭有面嘅富豪。
由於係高消費場所，所以公司規定囡囡要着性感晚裝示人，而每套衫都要囡囡自費購買，據聞晚裝、高跟鞋同手袋，都要買公司規定款式，成套加埋要成八九百蚊，所以買咗晚裝嘅囡囡，都一定會着住佢嚟陪客人玩，直至出街至換衫。
但由於近期打大風，不時有關部門都會派人嚟巡查，但凡見到有着住晚裝嘅囡囡喺卡拉OK房出現，而佢哋又冇工作證嘅話，就會控告夜場管理不善，輕則罰款，重則停業整頓。至於幾時輕、幾時重，就冇一定標準，所以好多夜場都唔敢博，於是下令全部囡囡返工時都換上晚裝喺花街等客人選妃，當被選中之後，囡囡立即換回便裝入房，假若遇上查牌，就詐稱係客人嘅朋友，以避免受罰。
囡囡便服坐枱，有部分客人覺得情有可原，但亦有唔少大豪客就投訴，覺得好冇面子，因為使咁多錢嚟捧場，希望歎到最高級嘅享受，但囡囡竟然以便服坐枱，話同去啲平價野雞場又有乜嘢分別？聽落又幾有道理，至於夜場方面，所作嘅安排亦都係為咗保護自己。
就珠海為例，有唔少規模較細嘅夜場，會搵啲唔專業嘅囡囡嚟做小姐，佢哋質素參差，有啲仲一身鄉土味，客人統稱呢啲夜場為「野雞場」，由於細場管理冇咁嚴，所以入職唔使畀按金，又唔使着制服，囡囡話嚟就嚟，話走就走。至於小費方面亦平好多，常見嘅係一、四、七制，如果係二、五、八制嘅，已經好高級架嘞！
撰文：小德