今個月中喺重慶舉行嘅國際汽車展，不少嚟自世界各地嘅名車都參與展出，正所謂香車配美人，一眾車模更成為車展焦點所在，但據網上消息指出，今屆車模嘅整體表現都差強人意，究竟當中有乜嘢原因呢？依家跟大家探討一下。
撰文：小德
車模嘅質素一般，咪以為係啲參展商出唔起錢，據講有啲內地嘅參展商，出到日薪一千蚊，比外地廠商出手仲要高，但唔知點解，就係請唔到人，睇番啲網友照片，靚女來來去去都係嗰幾個，但醜女就多到不得了，有網友更貼咗60件豬扒上網。
由於國產美女唔夠，於是有廠商惟有搵外援幫手，場中不乏外籍車模，佢哋身材出眾，舉手投足間更謀殺龍友們不少菲林，真係贏本地薑成幾條街，而且咪以為係外國品牌請佢哋，據講大部分起用佢哋嘅都係內地汽車生產商。點解會咁？原來外國車廠有錢，於是出天價請晒內地啲一級模持兒嚟駐場，內地車廠就算有錢都唔夠嗰啲大廠去搶，而剩低嘅豬扒仲學人開天索價，部分廠商於是索性搵外援嚟幫手。
公關公司於是就向身邊嘅外國朋友招手，當中有啲係內地讀緊書嘅大學生同埋企業員工，全部都肯客串演出。網友當然大讚呢批外援，總算為車展挽回一點面子，但大家都唔明白，點解今次車展會冇乜內地靚女肯出席呢？有網友話該段日子臨近高考，所以一眾兼職囡囡都冇出席，二來重慶雖然係大城巿，但離名模集中地嘅上海同北京都比較遠，交通都唔係咁方便，最重要仲係世博搶咗唔少騷女郎。
交通唔方便亦導致龍友嘅數目減少，再加上欠缺宣傳，所以大多數模特兒都選擇唔去。下年如果再搞，真係要諗諗辦法搞掂啲模特兒至好，如果慣性將豬扒當貂蟬，到時唔好話龍友唔會去，容乜易連睇車嘅人都唔去，咁就真係大件事啦！