上海搞世博，遊客人山人海，連夜場生意都好到不得了，特別係遊客喺世博園區行咗一日，夜晚都會去桑拿或者休閒中心幫襯，所以佢哋啲生意特別火爆，其中唔少提供另類服務嘅骨場都因為生意太好，取消相關服務。
上海為咗搞世博，事前都整頓過啲夜場，要佢哋守規矩，唔好亂嚟，所有大場都好識做，因為佢哋唔擔心冇生意，一於做個順水人情。但一啲位置偏僻嘅骨場，就諗住一於少理。但自五月開始，上海人流不斷，大場爆晒棚不特止，就算細場都一樣人山人海，生意好到不得了，而且啲遊客可能行得太攰，一揼就要兩粒鐘，而且往往仲要加鐘。
有朋友話生意好咪掂晒囉，都冇必要停止另類服務噃！據啲骨場老總透露，提供另類服務一般都要90分鐘，價錢大約兩百蚊左右，當中夜場賺百二，囡囡佔八十，但家陣90分鐘要嚟做按摩，收費可以去到三百蚊，夜場佔二百，囡囡佔一百。
由於小數怕長計，如果一晚有五十個另類服務嘅客人，就會令佢哋每晚少收五千蚊嘅收入，一個月計起嚟，就會少咗十幾萬，除咗收入問題，骨場最怕畀人查牌，萬一唔好彩中招，要勒令停業整頓，咁就真係乜嘢生意都冇埋。
所以骨場都情願「食少多覺瞓」，一於全面停止另類服務，客人當然冇得詐型，但囡囡會唔會少咗收入呢？其實計落條數佢哋係賺多咗嘅，但就要用氣用力，唔似做另類服務咁輕巧。如果客人真係有要求，佢哋放工後可以提供上門服務，收入將會更多，而且唔使畀公司食一份，所以囡囡對於呢次決定，都好少詐型。
撰文：小德