客人上邪骨場玩，老總都會叫晒啲囡囡列陣，等客人檢閱，搵自己嘅心頭好，內地叫呢個環節做「選妃」。但由於囡囡實在太多，二、三十人排一行要你行一轉，你都咪話唔腳軟，所以好多有規模嘅骨場，都開始安排囡囡上台，以行貓步形式嚟選妃。
撰文：小德
我哋搵嚟長安某骨場嘅主任玲姐，問吓佢囡囡走騷，箇中有冇啲不為人知嘅秘密。玲姐話：「骨場呢個新安排，其實有好多好處，第一樣就係間場會畀人感覺高級好多，其次亦會令班囡囡即時升呢，以前A牌B牌嘅囡囡，馬上變做模特兒，第三，客人嚟除咗揼骨，仲可以有表演睇，感覺上好似着數好多，第四，客人選妃時唔使學以前咁尷尬，同囡囡你眼望我眼，兼且要行到腳軟。」
但係扮模特走台步唔係人人都識，啲骨場會唔會安排專人嚟教佢哋呢？玲姐一笑：「有！個專人咪係我哋啲主任囉！我哋主任當中，有一兩個係專門負責照顧囡囡嘅，就要提供埋訓練畀佢哋，教佢哋行得似模似樣。」咁你哋啲主任又點識得呢？
玲姐話：「我哋咪四處搵啲光碟返嚟自己研究吓囉！起初我都唔識o架，但睇睇吓就明白點樣至走得靚，於是咪照住教班囡囡囉！好彩家陣啲90後悟性好高，叫佢揼骨都未必學得咁認真，但叫佢走騷，佢哋就好肯去學，而且都學到八、九成。」
有冇人真係學唔成雞手鴨腳呢？玲姐話：「都有o架！一啲山區出嚟嘅女仔，就會比較輸蝕。」學唔掂咁點算呀？玲姐話：「以前嚟做骨女，一定要識得揼骨，但家陣就一定要識得走台步，否則焗住做最低一級，搵嘅錢相差一百至幾百蚊，一日五個客，就搵少成千蚊，所以啲囡囡都會好認真咁惡補，希望盡快升呢！」呢班山寨模特兒，雖然未經正統訓練，但走起嚟又幾吸引，值得支持吓。