一個大型社區公園裏面，唔少得會有啲藝術雕塑擺喺度，以增添藝術氣息，而講得話藝術品，部分取材可能會同「性」扯上關係，好似昆明市嘅大觀公園，裏面有幾個擺咗五年嘅雕塑，突然引起軒然大波，市民強烈要求將呢啲藝術雕塑叮走。
撰文：小德
話說大觀公園喺五年前搞咗個「昆明首屆國際雕塑展」，當時嚟自世界各地嘅雕塑家，都有作品運嚟昆明參展，所有展品都擺放喺公園西面嘅空地，展出後，大觀公園就按公園嘅景點特色，徵得作者同意而留下一批雕塑，沿公園西面，開拓出約3公里長嘅旅遊徑，沿途擺放不同嘅雕塑，希望為公園增添文化藝術氣息，一直以嚟雕塑與市民大眾相安無事，和平相處。
但近幾個月就不斷有市民向媒體及公園反映，話展品當中不乏涉及性同不雅嘅題材，會令人尷尬，教壞小朋友，建議將呢批藝術品全部撤換，改為富雲南民族特色嘅藝術作品，而期間仲有一啲有分量嘅政治人物加入，狠批呢批作品不夠高雅。
公園見有大粒佬出聲，於是急向傳媒表示，佢哋係持開放嘅態度，絕對尊重市民嘅決定，而且仲話做緊份問卷，希望搜集所有使用公園人士嘅意見，然後決定係咪要將藝術品撤換。公園方面嘅言論大方得體，而且夠中肯，擾攘多時嘅問題暫時緩和落嚟。
當議論稍停嘅時候，就有藝術界嘅朋友出嚟講嘢，話藝術品並唔係人人都能明白，佢嘅意思係藝術嘅嘢，唔應該由市民大眾去決定，於是又引起新一輪嘅風波。有網友話公園純屬公眾地方，就應該由大眾決定擺啲乜嘢，但亦有人強烈反對，話博物館同藝術館都係大眾嘅地方，如果由市民大眾喜好去決定擺啲乜嘢藝術品，咁咪毫無藝術可言？相信公園將來點決定，都會兩面不討好，真係傷盡腦筋！