上個月尾佛山有單掃黃新聞，引起網友廣泛討論，話說掃黃行動前一日，有網友喺討論區發帖，話佢花咗唔少錢做臥底，發現南海某間桑拿中心掛羊頭賣狗肉，提供色情服務，該網友仲強烈要求警方採取行動，於是掃黃行動隨即展開。
呢單新聞最後一共拉咗三十幾人，其中一半係嫖友同妓女，另一半就係桑拿嘅工作人員，全部都被扣留。呢單嘢發生之後，有知情人士透露，由於呢張帖內容吸引，除咗涉及佛山南海當地一間超級大型桑拿場之外，當事人為咗做臥底，仲花咗2,800元呢個唔細嘅數目，買咗一張貴賓卡，混入桑拿場內搜集證據，比《無間道》電影更為吸引。帖子發出後，喺短短半日內，就已經累積兩百幾人次嘅點擊，反應異常熱烈。
呢張舉報帖子，南海警方當然一早就收到，但一如既往，佢哋都係停留喺觀望嘅態度，但呢個消息反而觸動到當地傳媒嘅神經，於是馬上展開跟進！
據知情人士反映，當地警方點解會喺24小時內高調採取行動，原來係受到傳媒嘅影響，發帖後由於點擊率高，於是傳媒主動接觸警方，經商討後，希望警方同媒體舉行聯合行動，記者可以隨隊出發，去現場拍攝行動過程。喺內地呢種行動並不罕見，一來警方可以喺市民面前做場好騷，而市民大眾又可以透過電視進入案發現場，可以話一舉多得，於是兩方面一拍即合。
當電視畫面上大批警察衝入現場，手持鐵錘逢門必破，目的並唔似掃黃，而係為電視台尋找新聞焦點，突然有所發現，馬上招呼媒體人員入內拍攝，場內一男兩女半裸踎喺一旁，警員仲怕記者唔明，做埋旁白話：「看！這裏居然玩雙飛！」玩雙飛罪大啲？定係新聞價值高啲呢？呢層真係冇人知嘞！
撰文：小德