最近內地好多桑拿場都加設囡囡走T台嘅服務，唔少骨場由原本每日一兩場，加到依家差唔多每個鐘都有，而且為咗令客人睇得開心，除咗加長表演時間，仲要求囡囡傾力演出，囡囡平時要學模特兒練貓步之外，有啲仲要學埋跳脫衣舞添！
我哋搵嚟骨場資深部長麗姐，問吓佢點解會有咁嘅安排呢？麗姐話：「以前客人揀女，我哋會叫啲囡囡一字排開，等客人逐個檢閱，但幾十個囡囡，客人行兩轉就已經腳軟，於是我哋諗到不如由囡囡行，等佢哋喺T台上面好似模特兒咁出場。」
自從推出呢項服務之後，客人就可以安坐大廳，細心欣賞全場囡囡嘅演出，而且睇啱心水，只要記低號碼，就可以同部長講安排囡囡入房盡興，咁樣好過喺花街揀女，你眼望我眼，搞到囡囡同客人都有啲尷尬。而且囡囡行T台，仲可以分到佢哋嘅級數。麗姐話：「行路似步操嘅囡囡自然係最低級，行起嚟有少少自信嘅就會安排為中級，至於行得最似模似樣嘅囡囡，我哋就會安排為最高級數。」
所以好多骨場都設有模特兒組，並唔係話佢哋真係做過模特兒，而係佢哋走台步似模似樣，跟模特兒一樣，囡囡只要行得好就可以升呢。其他囡囡想升呢，咁就要自我增值，得閒學吓走貓步，行得似模似樣，外表再執吓，公司就會替你升呢！
家陣走T台成為骨場例牌服務，幾懶嘅囡囡都要學走兩步，如果仲係步操或者冇厘精神嘅話，客人一定唔會揀你，加上永冇升呢機會，將會嚴重影響收入。所以有啲夠搏殺嘅囡囡，仲會加埋熱舞表演，豪放嘅仲玩埋脫衣舞，當然係點到即止，但客人收貨，拍爛手掌，公司就可以開個「舞蹈員組」，等囡囡同價錢齊齊升呢。所以家陣做囡囡真係要多才多藝，少啲功夫都好易畀人淘汰架！
撰文：小德