以前去夜場玩，睇騷就似乎係必定嘅事，無論係夜總會同A-Go Go吧都好，總係會搵一大班女出嚟娛賓，但係呢種咁嘅活動已經冇乜新意，都係搵條女喺台上面跳嚟跳去，咁就真係悶死台下嘅客人。所以近年夜場都會搵角色畀小姐做，即係話上台表演嘅女仔，個個都係有一定角色，就好似係護士、軍人或者天使等。近日刮王同唔少客人及夜場負責人傾開，大家估吓喺角色扮演入面，邊一種係客人最鍾意呢？原來係護士。點解？上面提過嘅幾種角色之中，原來因為白衣天使係最能夠代表到關心，理由都係一字咁淺，你由細到大去睇醫生，都有白衣天使喺你身邊安慰你，所以無形之中個個都當佢哋係愛護自己嘅人。咁當然，仲有好多原因，當中包括佢哋着上一套白色制服，感覺特別清純，畀人一份乾淨感覺，其次就當然係要多謝o架仔，因為喺呢二三十年間，大家睇日製嘅四仔之中，有唔少角色都係白衣天使，所以亦造就咗呢類角色係客人最愛。就以呢間A-Go Go吧為例，呢一個月就嚟搵白衣天使跳桌上舞，晚晚都爆場，咁你就明白呢一類角色係幾咁受歡迎啦！