明星愛賣二手衫響應慈善活動，原來脫星都會賣二手底衫，目的只係為搵啖食。喺美國四仔界，多年前已開始有脫星或插頁女郎，於網上出售拍攝時嘅有味底衫褲，近年更賣到成行成市，連一姐都喪拍賣，仲好搵過上床賣身！
當年網上售賣着過嘅胸圍底褲，通常都係唔多起眼嘅二打六脫星，幾十蚊一個胸圍，對當事人嚟講，算多條路數搵餐晏仔，交投亦未見活躍。但事隔多年，脫星網上賣物拍得住四仔碟銷量，或者係反應太勁，愈嚟愈多一線脫星開始將拍寫真甚至四仔時着過嘅胸圍、T-Back、絲襪、高踭鞋等等，總之賣得就賣，且售價仲非常高昂，依然有價有市，證明外國人對有味嘢情有獨鍾！
當然，可以嗌到咁高價嘅絕非等閒之輩，例如脫星Jana Cora一條拍攝四仔時着過嘅黑色透視T-Back，第一口開價就50美元，短短三日就接住有人「Bid」到120美元，七日後以150美元成交，阿妹更隨「褲」附送親筆簽名寫真數張，埋單計數仲貴過一套Blue Ray四仔，食水咁深，難怪各路脫星都爭住長賣長有啦！暫時要數脫星賣物之冠可算係Aria Giovanni，阿妹不但將身上所有物品出售，連屋企嘅床單、睡衣，又殘又舊嘅高踭鞋有理冇理都一樣照賣，近期阿妹更聯合姊妹送底褲益街坊，即買一送二，認真抵死！
呢個拍賣網，只限脫星及成人Model賣物，用家更可以按自己喜好，搜索偶像有乜筍嘢。跟一般拍賣網無異，買家可以發問留言，按「賣家」回應及送貨速度給予評分，但原來買家唔只得男性，連女士都爭住買，例如脫星Kaylee咁，有稱女買家表示欣賞阿妹嘅脫衣舞技，結果投得當事人出售嘅白色長靴，更着住表演畀伴侶睇。脫星拍賣網再發展落去，話唔定脫星住過間屋都有得賣喎！
撰文：祖