有一種病唔係性病，但會嚴重影響男女之間嘅性生活，就係「尿道炎」。據專家指出，性交頻繁，就算係固定伴侶，但唔注意個人衞生嘅朋友，最容易染上泌尿生殖道感染性疾病，病情可大可小。
大家聽到「尿道炎」，唔好以為只係婦科病，原來男性嘅感染率亦相當高，而且發病時冇乜迹象，到咗出現尿頻、尿痛、尿道灼熱等病徵時，病情已經十分嚴重。專家指出，大家咪以「尿道炎」係老年人嘅常見病，原來年輕人亦會患上。
特別係新婚夫妻，或者係久未見面嘅戀人，佢哋都會短時間內性交過度，加上個人及環境衞生唔好嘅話，都好容易患上「尿道炎」；有人會話尿道炎係男士與女士性交後，先至受到對方感染，將責任推晒落女士身上，其實未必，邊個係帶菌者，最重要係睇吓邊個嘅身體抵抗力差，就會最先感染，然後再喺性交時傳畀伴侶，所以咪亂咁指摘太太或愛人。
預防方面，夫妻或情侶就算幾激情都好，性交前都應沖個涼先，用清水同埋皂液，清潔外陰部分，有一點要注意，好多女士都會用盆仔嚟清潔陰道，特別係唔方便嘅日子，但要小心你個盆，一定要係專用盆，唔好再用佢嚟做其他嘢，擺放亦要小心，用前要特別清洗一下；如果兩人有替伴侶口交或愛撫性器嘅習慣，更要事前刷牙同埋清洗指甲，咁樣就可以有效預防尿道器官嘅感染。
完事後，最好用乾毛巾輕擦陰部，然後再去清洗；用紙巾亦可，但要質量好嘅紙巾，不要用一抹就溶解嘅紙巾；亦不可兩人共用一條毛巾嚟抹，更唔可以用底褲嚟抹；最後清潔妥當，可以飲適當嘅開水，讓尿道排出殘留嘅細菌，減低受感染嘅風險。
撰文：小德