每年春節過後就會有好多囡囡南下，當中有人入廠打工，有人就喺夜場搵食，十年前問佢哋下海嘅原因，十個有九個都係為咗賺錢，希望可以改善屋企人嘅生活，但家陣啲90後囡囡，居然唔知為乜，仲玩失蹤影響埋生意添！
喺深圳夜場做咗十幾年媽咪嘅紅姐，見證住70、80、90後囡囡嘅故事，佢話：「70後嘅囡囡十個當中有九個，都係為咗賺錢養家嚟做小姐，而當中有六、七成人係畀雞頭半呃半氹咁入行；但80後嘅囡囡，得番半數人係為咗養家，餘下半數人係因為離家出走過獨立生活，但出走後無以維生，於是就自己選擇做小姐，所以有過半數嘅囡囡係自願入行，冇人逼佢哋嘅。」
咁90後又出現乜嘢情況呢？紅組話：「問佢哋為乜嘢做小姐，十個有九個答唔出原因，唔似70後咁為家人，亦唔似80後咁為自己，勉強答到原因嘅，就係話唔想辛苦，想輕輕鬆鬆搵錢囉，或者朋友話做小姐好玩，我咪嚟玩吓囉。」
出現咁嘅情況代表啲乜嘢問題呢？紅姐話：「佢哋完全冇人生目標，心態絕對係做一日和尚，就敲一日鐘，冇晒積極性，我雖然唔係社會學家，唔知佢哋有咁嘅心態係好定唔好，但佢哋冇晒目標，做嘢就會好散漫，又遲到早退，以前我哋用罰款制度，囡囡一心搵錢嘅就會合作，但90後佢哋一啲都唔怕，喜歡就遲到，唔開心就早退，搞到我哋做管理嘅，真係好難呀！」
除咗難管理，仲有乜嘢問題呢？紅姐話：「深莞兩地最旺嘅夜場，唔係靠靚女多，而係靠管理制度好，但90後嘅囡囡唔跟呢套，經常得失啲客人，我哋講多句，佢哋就玩埋失蹤添！」據講唔好品嘅囡囡主要嚟自大城巿，而嚟自農村嘅就會好啲，好彩係咁，否則內地夜場唔使掃黃，都冧晒檔啦！
撰文：小德