家陣打工仔出嚟賺錢真係唔容易，古人用做牛做馬嚟形容，我睇真係差唔多。而喺相學中，有冇一啲相係可以輕輕鬆鬆咁賺錢，唔使做得咁辛苦嘅呢？原來係有嘅，但好奇怪，呢種相唔係睇五官，而係睇腳，今日就同大家深入探討一下！撰文：小德
原來相書話，要睇一個人賺錢容唔容易，就係睇佢嘅工作使唔使奔波勞碌，當中最緊要就係睇對腳，如果對腳生得靚，就代表唔使四處奔波，一生嘅財運都係輕鬆得到。
首先要睇吓對腳有冇肉，如果腳底同腳背都有肉地，咁就最好，但唔可以係水腫、黃腫腳，要對腳本身冇病但都肥厚多肉，咁至係好；仲有一點，就係皮膚摸落去要滑溜，咁就會出路遇貴人，打工做生意都經常得貴人幫助，一輩子可以話行運行到落腳趾尾。
另外，要睇吓腳板底嘅腳紋，如果要四處奔波，先至勉強餬口嘅朋友，腳紋全都係橫生；但如果生有直紋，即腳紋嘅兩端指住腳趾同腳跟嘅方向，咁就叫做直紋，有呢種紋嘅朋友，賺錢會好容易，就算打工，都係輕輕鬆鬆，唔使辛苦。如果直紋附近有痣，更係高級行政人員，屬下有唔少人跟你搵食，你返工簽吓名，開吓會就一日，一定唔會操勞，屬最好嘅命相。
最後係腳趾，腳趾頭下面都要肉厚，如果生成圓圓咁、一粒粒咁最好，仲要五隻連成一線，如果真係生成咁樣，恭喜你！就算瞓喺床上面，都有錢自動送上門，但師傅教落咪咁貪心，可能你受重傷保險送錢上嚟咁解！做人有時都係自食其力好啲！