香港人每日辛勤工作，有時間好應該去輕鬆一下，紓緩壓力。呢次為大家介紹嘅酒吧，裝修格調好之餘，環境舒服又企理，最適合大家約埋三五知己摸吓酒杯底，又或者舉行任何類型嘅派對活動。撰文、攝影：娟娟
雖然銅鑼灣一帶酒吧密集，之不過想搵一個理想嘅Clubbibg場地，其實都唔係咁容易o架！事關部分酒吧格局騎呢，唔係三尖八角，就係場內柱位特別多，感覺實在唔太舒服，與呢次介紹嘅酒吧分別甚大。
位於登龍街一幢商廈內嘅「OTTO Bar & Lounge」，步進店內，第一眼覺得相當企理，毫無烏煙瘴氣，再環觀四周，原來酒吧格局呈長方形，加上無柱式設計，可令人有一種毫無拘束嘅感覺。而設於窗邊嘅相連式梳化廂座，令整體嘅空間感大增，配合柔和嘅燈光效果及動感音樂，將酒吧變成咗一個大型舞池，無論節日同歡或者包場玩都一樣咁有氣氛。
特色廂房
若然朋友人數眾多，又想玩得自在一啲，就不妨包房玩。而呢度亦設有一間大型VIP房，獨特吊燈裝飾令房間充滿時尚感。至於設施方面，可謂一應俱全，如Plasma電視、無線卡拉OK等設備都有齊晒，更可容納三、四十人，最啱大家舉行各類型嘅派對，讓你一邊Clubbing，一邊享受熱鬧氣氛。
逢星期一及星期三為「Ladies Night」，女士全免任飲，男士$270。
VIP房於星期五、六，均設有任飲，男士$250，女士$200。